रत्नागिरीच्या सागरी सुरक्षेला मिळणार नवी ताकद! भारतीय तटरक्षक दलात अत्याधुनिक ‘एएलएच एमके-३’ हेलिकॉप्टर दाखल

रत्नागिरी – महाराष्ट्राच्या सागरी सुरक्षेच्या दृष्टीने महत्त्वपूर्ण पाऊल टाकत भारतीय तटरक्षक दलाच्या ताफ्यात अत्याधुनिक स्वदेशी एएलएच एमके-३ हेलिकॉप्टरचा समावेश करण्यात आला आहे. रत्नागिरी येथील भारतीय तटरक्षक दलाच्या हवाई तळावर ‘तटरक्षक ८७५’ या हेलिकॉप्टरचे पारंपरिक वॉटर कॅनन सॅल्युट देऊन स्वागत करण्यात आले. या हेलिकॉप्टरच्या समावेशामुळे पश्चिम किनारपट्टीवरील सागरी पाळत, शोध आणि बचाव कार्यासह तटरक्षक दलाच्या कार्यक्षमतेला मोठे बळ मिळणार आहे.

प्रगत तंत्रज्ञानामुळे सागरी पाळत अधिक प्रभावी

एएलएच एमके-३ हे अत्याधुनिक हेलिकॉप्टर प्रगत रडार, इलेक्ट्रो-ऑप्टिकल पॉड आणि ऑटोमॅटिक आयडेंटिफिकेशन सिस्टीमने सुसज्ज आहे. या यंत्रणांमुळे समुद्रातील संशयास्पद हालचालींचे निरीक्षण करणे, लक्ष्याची ओळख पटवणे आणि दूरवरच्या परिसरावर लक्ष ठेवणे अधिक प्रभावी होणार आहे. याशिवाय, हेलिकॉप्टरमध्ये १२.७ मिमी क्षमतेची हेवी मशीन गन बसवण्यात आली आहे. त्यामुळे आवश्यक परिस्थितीत प्रतिसाद देण्याची तटरक्षक दलाची क्षमता वाढणार आहे.

रत्नागिरीत पाच हेलिकॉप्टर तैनात होणार

रत्नागिरीतील ८३१ स्क्वॉड्रनमध्ये तैनात करण्यात येणाऱ्या पाच एएलएच एमके-३ हेलिकॉप्टरपैकी ‘तटरक्षक ८७५’ हे पहिले हेलिकॉप्टर आहे. उर्वरित हेलिकॉप्टरचा टप्प्याटप्प्याने समावेश झाल्यानंतर या स्क्वॉड्रनची कार्यक्षमता आणखी वाढणार आहे. पश्चिम किनारपट्टीवरील विस्तीर्ण सागरी क्षेत्रात सातत्याने हवाई पाळत ठेवणे आणि आपत्कालीन परिस्थितीत तातडीने मदत पोहोचवणे यामुळे शक्य होणार आहे.

शोध आणि बचाव कार्यालाही मिळणार गती

या हेलिकॉप्टरमुळे सागरी शोध आणि बचाव मोहिमा, प्रदूषण नियंत्रण, किनारपट्टीवरील देखरेख तसेच देशाच्या विशेष आर्थिक क्षेत्रातील (ईईझेड) सागरी हितसंबंधांचे संरक्षण अधिक सक्षमपणे करता येणार आहे. विशेषतः महाराष्ट्राच्या संवेदनशील किनारपट्टीवर सागरी सुरक्षेच्या दृष्टीने या हेलिकॉप्टरची भूमिका महत्त्वाची ठरणार आहे.

आत्मनिर्भर भारत’च्या दिशेने महत्त्वाचे पाऊल

केंद्र सरकारच्या ‘आत्मनिर्भर भारत’ संकल्पनेला बळ देणाऱ्या या समावेशामुळे भारतीय तटरक्षक दलाच्या स्वदेशी हवाई क्षमतेत वाढ झाली आहे. हिंदुस्तान एरोनॉटिक्स लिमिटेड (एचएएल) सोबतच्या करारांतर्गत समाविष्ट करण्यात आलेले सीजी ८७५ हे नऊ हेलिकॉप्टरच्या करारातील पाचवे एएलएच एमके-३ हेलिकॉप्टर आहे.

रत्नागिरीतील या नव्या तैनातीमुळे भारतीय तटरक्षक दलाच्या हवाई मोहिमांना अधिक बळ मिळणार असून, महाराष्ट्राच्या किनारपट्टीसह पश्चिम किनारपट्टीवरील सागरी सुरक्षा व्यवस्थेला नवी ताकद मिळण्याची अपेक्षा आहे.

कोकण ऑनलाईन रत्नागिरी