गोमाता आणि गोवंशाच्या रक्षणासाठी रत्नागिरीत आदर्शवत उपक्रम

रत्नागिरी- रत्नागिरी शहरात मोकाट वावरणाऱ्या गोमाता आणि गोवंश यांच्या सुरक्षेसाठी सामाजिक कार्यकर्ते योगेश हळदवणेकर यांनी एक अत्यंत स्तुत्य आणि आदर्शवत उपक्रम राबविला आहे. रस्त्यांवर, विशेषतः रात्रीच्या वेळी, अपघातग्रस्त होणाऱ्या या मुक्या जनावरांचे जीव वाचवण्यासाठी त्यांनी या गोवंशाला ‘रेडियम बेल्ट’ (Redium Belt) घालण्यास सुरुवात केली आहे. यासाठी त्यांच्यासोबत शशिकांत गुरव आणि अजिंक्य केसरकर यांनी मदत केली. हे बेल्ट ग्रामीण पोलीस ठाणे रत्नागिरी यांच्या सहकार्याने मिळाल्याने हळदवणेकर यांनी त्यांचे आभार मानले. 

मुख्य रस्ते आणि वर्दळीच्या ठिकाणी अनेक गोवंश मोकळे फिरत असतात. रात्रीच्या अंधारात वाहनचालकांना ही जनावरे वेळेवर न दिसल्याने अनेकदा गंभीर अपघात होतात, ज्यात गोवंशाचा बळी जातो किंवा त्यांना गंभीर दुखापत होते. ही बाब लक्षात घेऊन हळदवणेकर यांनी गोवंशाच्या गळ्यामध्ये चकाकणारे रेडियम बेल्ट बांधण्याची मोहीम हाती घेतली आहे. या रेडियम बेल्टमुळे रात्रीच्या वेळी दूरूनही वाहनचालकांना रस्त्यावर उभी असलेली जनावरे स्पष्टपणे दिसू शकतात. यामुळे ते वेळीच आपल्या वाहनाचा वेग नियंत्रित करून अपघात टाळू शकतात. हळदवणेकर आणि त्यांच्या सहकाऱ्यांनी आतापर्यंत अनेक गोमाता आणि गोवंशाला हे सुरक्षा बेल्ट लावले आहेत. त्यांच्या या कार्यामुळे रत्नागिरीतील प्राणीप्रेमी आणि नागरिकांकडून त्यांचे विशेष कौतुक केले जात आहे. योगेश हळदवणेकर यांच्या या कार्यातून केवळ प्राणीप्रेमच नव्हे, तर सामाजिक बांधिलकीचेही दर्शन घडते. प्रशासनाने किंवा नागरिकांनीही अशा प्रकारे आपल्या परिसरातील मोकाट जनावरांच्या सुरक्षेसाठी पुढाकार घेतल्यास, रस्त्यांवरील अपघातांचे प्रमाण लक्षणीयरीत्या कमी होऊ शकते. हळदवणेकर यांनी रत्नागिरीत गोसंरक्षणाचा एक नवा आणि कृतीशील आदर्श निर्माण केला आहे, जो इतरांसाठीही प्रेरणादायी आहे.

कोकण ऑनलाईन रत्नागिरी