कोकण रेल्वेच्या संचालक (वित्त) पदी कविता सातवी

रत्नागिरी – कोकण रेल्वे कॉर्पोरेशन लिमिटेडच्या संचालक (वित्त) पदी श्रीमती कविता राकेश सातवी यांची नियुक्ती झाली असून, त्यांनी २३ ऑक्टोबर २०२६ रोजी पदभार स्वीकारला. वित्त, लेखा आणि व्यावसायिक कामकाज या क्षेत्रांतील २४ वर्षांचा प्रदीर्घ अनुभव त्यांच्या गाठीशी आहे.

कविता सातवी यांनी आपल्या कारकिर्दीत खाजगी तसेच निम-सरकारी क्षेत्रांमध्ये विविध महत्त्वाच्या पदांवर काम केले आहे. वित्तीय नियोजन, अर्थसंकल्प, निधी व्यवस्थापन, कर आकारणी, लेखापरीक्षण, जोखीम व्यवस्थापन, अंतर्गत वित्तीय नियंत्रणे, वित्तीय अहवाल आणि कॉर्पोरेट प्रशासन या क्षेत्रांत त्यांना विशेष प्रावीण्य आहे. व्यवसाय परिवर्तन, प्रक्रिया सुधारणा आणि नवीन प्रणालींची अंमलबजावणी यांसारख्या कामांचाही त्यांच्या अनुभवात समावेश आहे.

कोकण रेल्वेच्या संचालक मंडळात नियुक्ती होण्यापूर्वी त्यांनी चेन्नई येथील कामराजर पोर्ट लिमिटेडमध्ये मुख्य वित्तीय अधिकारी (CFO) म्हणून जबाबदारी सांभाळली. या पदावर कार्यरत असताना ४५० कोटी रुपयांच्या कॅपिटल ड्रेजिंग प्रकल्पासाठी पब्लिक इन्व्हेस्टमेंट बोर्डाची मंजुरी मिळविण्यात त्यांनी महत्त्वाची भूमिका बजावली. तसेच, प्रलंबित आयकरविषयक मागण्यांचे निराकरण, महसूल विश्लेषण अहवाल तयार करणे आणि निधी व्यवस्थापन यांसारख्या महत्त्वाच्या कामांमध्ये त्यांनी योगदान दिले. याशिवाय, १२०० कोटी रुपयांच्या प्रारंभिक समभाग विक्रीच्या (IPO) प्रक्रियेची जबाबदारीही त्यांनी सांभाळली होती.

यापूर्वी त्यांनी जे. एम. बक्षी पोर्ट्स अँड लॉजिस्टिक लिमिटेडमध्ये उपाध्यक्ष (वित्त), एपीएम टर्मिनल्समध्ये सहाय्यक महाव्यवस्थापक (वित्त), भारत मुंबई कंटेनर टर्मिनल प्रायव्हेट लिमिटेडमध्ये व्यवस्थापक (वित्त), कंटेनर कॉर्पोरेशन ऑफ इंडिया लिमिटेडमध्ये पश्चिम विभागाच्या वित्त प्रमुखपदी तसेच कॉनकॉर एअर लिमिटेडमध्ये वित्त प्रमुख म्हणून काम केले आहे. या विविध जबाबदाऱ्यांमुळे त्यांना वित्तीय व्यवस्थापन आणि धोरणात्मक नियोजनाचा व्यापक अनुभव प्राप्त झाला आहे.

कविता सातवी या चार्टर्ड अकाउंटंट (CA) आहेत. त्यांनी ऑस्ट्रेलियातील डिकिन विद्यापीठातून ग्लोबल एमबीए पदवी संपादन केली असून, एसीसीए (यूके) कडून इंटरनॅशनल फायनान्शिअल रिपोर्टिंगमधील डिप्लोमा पूर्ण केला आहे. पहिल्याच प्रयत्नात सीए परीक्षा उत्तीर्ण होण्याची उल्लेखनीय कामगिरीही त्यांनी केली आहे.

वित्तीय व्यवस्थापनातील प्रदीर्घ अनुभव, उच्च शैक्षणिक पात्रता आणि विविध महत्त्वाच्या संस्थांमधील कामाचा अनुभव यांच्या बळावर कविता सातवी आता कोकण रेल्वेच्या आर्थिक व्यवस्थापनाची महत्त्वपूर्ण जबाबदारी सांभाळणार आहेत.

कोकण ऑनलाईन रत्नागिरी